આપણા સંબંધ આપણી વચ્ચે નામ વિનાનાં

આપણા સંબંધ આપણી વચ્ચે

આપણા સંબંધ આપણી વચ્ચે નામ વિનાનાં,
આપણે રસ્તા રસ્તા તોયે ગામ વિનાનાં.

કેટલાં જનમ મ્હેણું રહેશે મળવાનું આ કેણ,
કેટલાં ઝરણાં ભેગાં થઈને થાય નદીનું વ્હેણ;
આપણે કાંઠે લંગર તોયે વ્હાણ વિનાનાં,
આપણે રસ્તા રસ્તા તોયે ગામ વિનાનાં.

ઝાડથી પડતાં પાંદડા ઉપર કુંપળ આંસુ સારે,
ઝાડની છાયા તડકો પહેરી લૂંછવાનું શું ધારે;
આપણે મૂળમાં ઝાડ છતાંયે આભ વિનાનાં,
આપણે રસ્તા રસ્તા તોયે..ગામ વિનાનાં.